Dan sheeg

waxan gabaygan ugu tala galay isbeedelka Puntland ka dhacay, wuxuna si toos ah ula hadllayaa masuuliyiinta cusub ee la doortay iyo waliba dadka reer Puntland, wuxuna soo baxay 23/01/2014, ka bogasha wacan:

1.Da'da gabayga waataanan deyey toban diraacoode

2.Waataan dedalkii ka haray daba galkiisiiye

3.Markii derejadiisii luntaan daayey hadalkiiye

4.Markii duunya lagu raadsadaan huray dantiisiiye

5.Inaan dibad ka jooogaan jeclaa aanan daakhiline

6.Debnahay dhaqaaqaye markale duub isma lahayne

7.Danqashada dalkaa igu qasbiyo duxiyo iimaane

8.Kana waa hal door iyo midaan caawa daabacaye

9.Waa daadeg hoosiyo wax sheeg hooris daba yaale

10.Mar dadkaygu suu doonayaan dan uga faalloonin

11.Madax daan dirnaan dood la furi daniyo yeelkeede

12.Marna waa digaayaa dadkaan halal dareensiinin

13.Oo waa dan sheeg iyo farriin daacad xoog badane

14.Ninka yiri dalbaan hagi hogaan debecsan baan yeelan

15.Ee uunku wada doortayee lala damaashaaday

16.Dad baa kugu game e garo dedaal culusna meelayso

17.Degsiimadu siday tahay ogow waxa lagaa dooni

18.Dar dar geli umuuraha xaqaa lagu dedaalaaye

19.Hadii aad durriyad leedihiyo danabya awlaada

20.Intaad wada daryeeshaad sinnaan ugu dedaashaaye

21.Waxa  taa la dira waa dadkaad dabar u haysaaye

22.Haw kala darnaan oo midkood dibada yuu seexan

23.Dusha saar midkii daala iyo kay darxumo hayso

24.Daadihi wixii dura hayiyo doog xun ka ilaali

25.Dareensii inay wada yihiin dabin walaaloobey

26.Dabaq fooqa kii jiifa iyo derinba kaan haysan

27.Midka laxamka duhurkii cuniyo kaan dab shidanaynin

28.Dar ilaahay waa siman yihiin waana kala doore

29.Mid waliba wuxuu kaa dalbado haw dawa la'aanin

30.Yey kala dibboodin hal dhinac diirada ha saarin

31.Dareensii inay wada yihiin dabin walaaloobey

32.Degaankeenu waa gibin misana daas fog baa jira e

33.Duul wada degaan nahay misana waaynu derisnaaye

34.Dadku waa hal xaafada dhammaan waana kala daare

35.Dooxada nuugaaleed taniyo dararta Buuhoodle

36.Degta Gaalkacyood darafka iyo garacad daanteeda

37.Daafaha Qardhood xeebta dedan dacalladii Bayla

38.Dhulka durugsan dooxada Sanaag buurta dabadeeda

39.Dur durkii xalmeed iyo taleex degel wanaageeda

40.Hadaan dawladnimadeena iyo dooggu ka iftiimin

41.Oo aad hal meel wada degtaan waa wax noo darane

42.Derejada ay keentaana waa dacar kharaaraatey

43.Dan waa seeto oo waa midaan cidina diidayne

44.Isdaryeel dakaygow halbaan kaaga digayaaye

45.Nin walaalki daayacay dhibuu dararsanaayaaye

46.Isdaadihiya duul wada dhashiyo dawlad baan nahaye

47.Derisnimada yaan loo darnaan nabadu yeey duugmin

48.Dunidaan ku noolahay hadaan maanta dibu eegno

49.Oo dawladaha xoogga badan dhabu diraasayno

50.Isgargaarsi duuglaa arliga lagu dul joogaaye

51.Inaad adigu daab iga rabtiyo godin wax kuu deyrta

52.Aniguna dabaan kaa shitiyo dhuxul yar doonaayo

53.Hadii aan dareenkeedu jirin duni ma joogneene

54.Buuraha dalkeena ah hadaan fooxa laga doonin

55.Oo maydiga la daabulin misana doonya laga buuxin

56.Duunyadiyo xoolaha hadaan dibada loo dhoofin

57.Duurjoogta kaydka ah hadaan lagu dalxiisaynin

58.Dalka udugna aan sheeganaa waa dabbaalnimo e

59.Baddan dedan biyaha duulayee dunida maansheeyey

60.Iliilaha durdurayiyo togaan dooxa dhinac yaala

61.Hadaan beera lagu deyrinoo dalag la meelaynin

62.Durfi iyo jawaan quud ku jira dubay kasoo dhoofso

63.Ku daryeeli meysoo wax li'i kaagasii darane

64.Dihnigaaga geli  taa anaa kaagasii degeye

65.Mar hadaan halkaa degey dhabtii waa dul taagnahaye

66.Nin rabaa ha diidoo ninkale haw durbaan tumo e

67.Deeqlow allahayow adaan daacad kuu ahaye

68. Adaan kaa dalbanayaa codsina kuu dirsanayaaye

69.Daqarrada xumaanta ah allow naga ded muuqooda

70.Eebbow dariiqii san iyo diinta nagu toosi